21 SRËMIANNIKA 2017 R. W BÙKÒWINIE

Wiedno w kalãdôrzu je tak samò -1. dzéń zymkù, dzéń szkòłowégò wanożnika, a latos w Bùkòwinie w szkòle jesz … Kaszëbsczi Dzéń.

Jak to zrobic, bë bëło përznã jinaczi? Wszëtcë mëslą! I wëmëslëlë! Warkòwniei wanoga nad jezórkò! Nibë nick wiôldżégò, a jiwrów z tim i tak pieczelno wiele. Jak to ùszëkòwac, chto co zrobi? Nôwicy mësla Direkcjô. Mô bëc czekawò i … tóno. Òdpadła w przedbiegach za drogô, jak na najã czeszeń, mésterka òd warkòwniów ze swiata. Przëjedze wasta Sela z Gòwidlëna i pòkôże, że nié swiãti grónczi lepią, a w Bùkòwinie téż mògą. Brëkòwné są kwiatë na Jastrowé Palmë – róbmë kwiôtczi! Wastnô szkólnô Iwona wëczarzi z papióra farwną zymkòwą pażãc, smùżk, łãżëcã i mëmczin ògródk. Jak przëszëkòwac jastrowé kaszëbsczi pisanczi, przëbôczi szkólnô òd kaszëbsczégò – wasnô Wanda. Wastnô Asza wëczarzi z jednym karnã w papiórze i z mase z sole rozmajité pòstacëje i sztôłtë.

Na wiôldżi scanie w szkòłowim dómie pòkôzałë są bòcónë, kaszëbsczé kwiatë i nôdpis „WIOSNA, WIOSNA, ACH, TO TY” i „WITÓMË ZYMK” – wëczarzoné przez wastnë Iwonkã, Teresã, a przërzeszoné na półtnie przez ùczniów. Pòjawiło sã téż na dekòracji dzéwczątkò w kaszëbsczich ruchnach – dopiãła swégò Daria!

Kòl 8.00 zaczãłë sã warkòwnie. W jedny salë: glëna, garncarsczé kółkò, bacherk z wòdą, ùczapóné rãce i … cëda wëtoczoné z gróscë glënë, stoją na délu i bùsznią sã swòjima sztôłtama – widzec to na òdjimkach! W drëdżi salë – bruné jaja ùgòtowóné w skórach òd cëbùlë, skrobóné – pisóné, to pòstãpné cëda. Za nôlepszé bëłë nôdgrodë – jastrowé zajce i barónczi. Swòjim kùńsztã robieniô farwnëch kwiatów pòdzelëła sã wastnô Iwonka. Czë sygnie jich na palmë? Żlënié, dorobimë wicy. W stołówce naczapóné mòcno, bò mòkri papiór, zmiészóny z masą z solë, je wszãdze, ale rozmajité pòstacëje i sztôłtë mùszą wëschnąc i żdac na malënk.

Pò warkòwniach zjawiła sã wastnó direktorka Danka Wesołowskô, chtërna to dopôłnié bëła z uczniama w Serokòjcach. Przińdną szkòłã mùszi òbezdrzec, nim zacznie sã w ni ùczbã, kòżdi ò tim wié.

Przed wińdzenim bùten, wszëtcë ùczniowie i szkólny zeszlë sã w wiôldżim dómie, II klasa pòpisa są pòznónyma kaszëbsczima piesniczkama, karno z chùru zaspiéwało swòje piesnie z kònkùrsu z Lëzëna i … w drogã! Z „Marzanną” na przódkù farwné karnò z kaszëbsczima fanama, z rozmajitima brząkadłama szło przez wies nad jezórkò, bë òddzãkòwac sã z „Panią Zëmą”. Słunuszkò pòkôzało swòjã mòc, swiécëło i ceszëło sã redoscą dzôtków. Pò „Marzannie” òstała grósc pòpiołu, przepadła, a w ògniskù na czijach piekłé bëłë wòrztë, chtërné w tim môlu i w tim sztócë szmakałë za wicy. Ògniszcze rozpôlëlë ùczniowie z IIIg, pòd czerënkã wastë Adama.

Kòl 2. pò pôłnim wesołé karno znôw bëło w szkòle. Jem dbë, że ò tim, co bëło tegò dnia w Bùkòwinie, przëbôczą òdjimczi.

I jô tam bëła, co pamiãtóm, jem wiérno òpisa – Damroka

Słowôrzk - słowniczek

warkòwnie – warsztaty, zajęcia praktyczne

wark – zawód

jiwer – kłopot, zmartwienie

pażãc, smùżk, łãżëcã – rodzaje łąk

z gróscë – z garści

farwnëch – kolorowych, barwnych

żlë – jeżeli

lëchò - źle

w dómie – w korytarzu